Помалку од 50 единки опстануваат во шумите на Македонија, Албанија и Косово – земји кои се стремат кон членство во ЕУ.

На 24 септември, балканскиот рис беше во фокусот на настан во Европскиот парламент, организиран од EuroNatur и европратениците Себастијан Евердинг од Tierschutzpartei и Томас Вајц.Пораките се дека:

заштитата на балканскиот рис е европска одговорност

неговата заштита е мерило за зачувување на видовите во земјите кандидати

прекуграничната соработка е од суштинско значење

заштитените подрачја се важен темел, објави Македонското еколошко друштво.

Како да се спаси?

Балканскиот рис е подвид на евроазискиот рис – и е загрозен од истребување. Неговите последни преостанати живеалишта се во Северна Македонија, Албанија и Косово, земји кои во моментов се во процес на пристапување кон Европската Унија.

На 24 септември, во Европскиот парламент се одржа настан под покровителство на EuroNatur и на покана на двајца европратеници, Себастијан Евердинг и Томас Вајц, на кој разни засегнати страни од владини и невладини организации се собраа за да разговараат за тоа како балканскиот рис може да се спаси од истребување. За време на настанот, беше нагласено дека еколошките обврски не смеат да се занемарат во процесот на проширување на ЕУ – напротив, заштитата на балканскиот рис е пример за вистински напредок во зачувувањето на природата во овој регион.

„Европскиот парламент има многу јасна одговорност да дејствува како еден вид чувар и да обезбеди дека биодиверзитетот не е занемарен за време на процесот на проширување“, рече Себастијан Евердинг од Левичарската група (GUE/NGL) во Европскиот парламент. „Инструментите за ова се веќе воспоставени. Нашата задача како парламент е да обезбедиме овие рамки да не останат само зборови на хартија, туку да се спроведуваат во пракса“.

Настанот ја истакна важноста на големите заштитени подрачја како што е Националниот парк Маврово во Северна Македонија. „Заштитените подрачја не се единствениот, туку се исклучително важен камен-темелник на секоја ефикасна стратегија за заштита на балканскиот рис“, нагласи извршниот директор на EuroNatur, Габриел Швадерер. Веќе неколку месеци има постојани извештаи за прекршувања, како што е неконтролираната сеча во Националниот парк Маврово.

„Опстанокот на балканскиот рис ќе биде мерило за тоа дали проширувањето на ЕУ со вклучување на земјите од Западен Балкан ги исполнува ветувањата на Европа. Тоа е тест за кредибилитетот на сите нас“, рече европратеникот Томас Вајц од Зелените на крајот од настанот. „Да го користиме овој симбол не само како потсетник за тоа што би можеле да изгубиме, туку и како инспирација за тоа што сè уште можеме да заштитиме ако дејствуваме заедно“.

Една од најретките мачки во Европа

• Со помалку од 50 преостанати единки, балканскиот рис (Lynx lynx balcanicus) е една од најретките мачки во Европа. Овој загрозен подвид на евроазискиот рис се наоѓа во југозападниот Балкан и е загрозен од исчезнување поради губење на живеалиштата, нелегално убивање и мала големина на популацијата.
• Балканскиот рис моментално се наоѓа во Северна Македонија, Албанија и Косово.